Հոկտեմբերի 18-ից 19-ը Լիտվայի մայրաքաղաք Վիլնյուսում տեղի ունեցավ Եվրոպայի հանրային ծառայությունների արհմիության (EPSU) Երիտասարդական ցանցի հերթական տարեկան հանդիպումը, որին մասնակցեց Հայաստանի պետհիմնարկների, ՏԻՄ—երի աշխատողների արհմիության անդամ Տաթևիկ Բաղդասարյանը։
Երկու օրվա ընթացքում երիտասարդները քննարկեցին մի շարք հարցեր՝ կարճաժամկետ պայմանագրերի, հաստիքների անբավարարության, արհմիությունների մասին տեղեկացվածության, ոչ բավարար վարձատրության մասին։
Հանդիպումների ընթացքում զեկույցների և խմբային աշխատանքների միջոցով երիտասարդները մի շարք քննարկումներ ունեցան, այդ թվում՝ օրգանայզինգի, արհմիությունների կողմից սոցիալական հարթակների արդյունավետ կիրառման, արհմիության մարմիններում երիտասարդների ներգրավման, աշխատողների վրա պատերազմների ու աջական իշխանությունների ազդեցության, սոցիալական ու վարձատրության հետ կապված խնդիրների ու կոլեկտիվ արշավների լավագույն փորձի, հանրային ծառայությունում երրորդ կողմից բռնության կանխարգելման մասին։ Քննարկվեցին Երիտասարդական ցանցի հետագա անելիքները և դրա դերը EPSU-ում, իսկ մասնակիցները փոխանակվեցին իրենց արհմիություններում կազմակերպված գործողությունների լավագույն փորձով։ Այս հանդիպումը ևս մեկ քայլ էր երիտասարդների համագործակցությունը ամրապնդելու և համաեվրոպական մակարդակով փորձի փոխանակման ուղղությամբ։
Նիստի արդյունքում համալրվեց նաև Երիտասարդական ցանցի Ղեկավար կոմիտեի կազմը։ Ուրախությամբ հայտնում ենք, որ Կոմիտեի կազմում ընտրվեց նաև Տաթևիկ Բաղդասարյանը։
