2022 թվականի ապրիլի 4-ին տեղի ունեցավ ՀՀ – ԵՄ համապարփակ և ընդլայնված համաձայնագրով (CEPA) սահմաբնված Քաղաքացիական հասարակության պլատֆորմի (ՔՀՊ) Հայաստանից ընտրված անդամների առցանց հանդիպումը։ Հանդիպման նպատակն էր պաշտոնապես տալ Պլատֆորմի աշխատանքների մեկնարկը, քննարկել առաջիկա անելիքները և սահմանել Պլատֆորմի՝ մոտ ապագայի հիմնական առաջնահերթությունները։ Պլատֆորմի անդամները մտքեր փոխանակեցին ներքին և արտաքին հաղորդակցության վերաբերյալ և համաձայնեցին Հայաստանի կառավարության և ԵՄ կառույցների հետ ակտիվ երկխոսության գնալու անհրաժեշտության շուրջ։ Ընդգծվեց նաև քաղաքացիական հասարակության լայն շրջանակների հետ համագործակցության կարևորությունը։
Հանդիպմանը միացավ նաև Հայաստանում Եվրոպական միության պատվիրակության ղեկավար, դեսպան Անդրեա Վիկտորինը` մասնակիցներին իր ողջույնի խոսքը փոխանցելու համար: Դեսպանը վերահաստատեց ԵՄ հանձնառությունը՝ աջակցելու Հայաստանին ՀԸԳՀ-ի շրջանակներում և դրանից դուրս ձեռնարկված բարեփոխումների ջանքերում: Նա նաև ընդգծեց քաղաքացիական հասարակության՝ մարդու իրավունքների պաշտպանության և ապատեղեկատվության դեմ պայքարի ոլորտների բարդ թեմաների շուրջ միասնական ձայնով խոսելու, ինչպես նաև դաշտի այլ դերակատարների հետ կառուցողական համագործակցության անհրաժեշտությունը:
Հիշեցնենք, որ Հայաստանի արհմիություններից Պլատֆորմում ներկայացված է Հայաստանի պետհիմնարկների, ՏԻՄ-երի աշխատողների արհմիության կազմակերպական աշխատանքների և արտաքին կապերի մասնագետ Արսեն Իգիթյանը։
Նյութի աղբյուրը՝ ԵՄ արևելյան գործընկերության Հայաստանյան ազգային պլատֆորմ։