Category: covid19

Առանց որևէ քննարկման, ՀՀ Առողջապահության նախարարի օգոստոսի 20-ի թիվ 65-Ն հրամանով փոփոխություններ են կատարվել նախարարի 2020 թվականի օգոստոսի 4-ի «Հայաստանի Հանրապետությունում կորոնավիրուսային հիվանդության (COVID-19) տարածման կանխարգելման նպատակով կիրառվող ՍԿ N 3.1.2-001-20 սանիտարական կանոնները հաստատելու մասին» թիվ 17-Ն հրամանում։ Սահմանվել է, որ հոկտեմբերի 1-ից Հայաստանի Հանրապետության բոլոր ոլորտների չպատվաստված աշխատողները 14 օրը մեկ պետք է գործատուին ներկայացնեն, սեփական միջոցներով հանձնած, ՊՇՌ թեստի պատասխանը, ինչի մասին գործատուն պարտավոր է գրառում  կատարել համապատասխան գրանցամատյանում։

Պարզեցինք, որ աշխատողների կողմից 14 օրը մեկ ՊՇՌ թեստի արդյունքների ներկայացումը սահմանվել է Առողջապահության նախարարի օգոստոսի 20-ի թիվ 65-Ն հրամանով, որով փոփոխություններ են կատարվել 2020 թվականի օգոստոսի 4-ի «Հայաստանի Հանրապետությունում կորոնավիրուսային հիվանդության (COVID-19) տարածման կանխարգելման նպատակով կիրառվող ՍԿ N 3.1.2-001-20 սանիտարական կանոնները հաստատելու մասին» թիվ 17-Ն հրամանում։ Փաստորեն, Առողջապահության նախարարի հրամանով սահմանվել է կարգավորում, ըստ որի ՀՀ բոլոր չպատվաստված աշխատողները պետք է իրենց միջոցների հաշվին թեստավորում անեն։

Մի քանի օր է, ինչ պաշտոնատար անձինք հայտարարում են, որ հոկտեմբեր ամսից չպատվաստված աշխատողներին պարտադրվելու է 14 օրը մեկ ՊՇՌ թեստ հանձնել։
Կառավարության մտադրությունը՝ ավելացնել պատվաստման տեմպերը տարբեր խթանող միջոցառումներ նախատեսելով՝ ողջունելի է։ Սակայն գտնում ենք, որ աշխատողներին իրենց հաշվին ամիսը երկու անգամ թեստ հանձնել պարտավորեցնելն անօրինական է։ 

Հայաստանի պետհիմնարկների, ՏԻՄ-երի աշխատողների արհմիությունը Կառավարությանն առաջարկում է պատվաստվող աշխատողներին տրամադրել 2-օրյա վճարովի արձակուրդ։

Չնայած նրան, որ ՀՀ բոլոր ժամանակների կառավարությունների վարած քաղաքականությունը հիմնականում հանգեցրել է պետական ծախսերի կրճատման և սոցիալական երկխոսության ճնշման, այնուամենայնիվ, մենք ականատես ենք լինում հանրային ծառայություններում կանանց խիզախ գործողություններին և անձնվեր ներդրմանը, ինչն ավելի ընդգծվեց COVID-19 համավարակի ու պատերազմական գործողությունների ընթացքում։